2011 年 - 鴻星秋冬臘味食譜推介 - (5) - 香菇臘肉水晶包

呢個秋冬真係試食左好幾款臘味產品，韋太發覺原來做臘味食譜，唔單只係次次都做蘿蔔糕及炒芥蘭都可以做出不同的配搭。只要大家花小小心思去想一想，一頓美味的菜色就容易做到出來 !
講開選購臘味產品，當然選購香港製造的保證安全及食得放心啦 !
至於買那一個品牌產品 ? 當然係睇下韋太曾經推介過的食譜就有答案及有信心選購啦 !

最後一個要介紹的菜色，食落都好得意及彈牙的感覺....
大家有興趣就試下啦 !
 

 
香菇臘肉水晶包
材料:
鮮肉臘腸    1條
鮮鴨膶腸    1條
馬蹄        6粒  (去皮)
甘筍        60克 (去皮)
鮮冬菇      6朵
四季豆      6條
粉皮        3張
調味料:
雞粉    1/4茶匙   砂糖  1/4 茶匙  
獻汁  :  粟粉  1/2 茶匙     清水  1湯匙


做法 :
1. 將兩款臘腸放在碟上，放入鑊內蒸約10分鐘，放涼後切幼粒，備用。
2. 粉皮預先用清水浸30分鐘至軟身，然後放入滾水中煮1分鐘後取起抹乾，每塊分成4份，備用。
3. 將馬蹄、甘筍、鮮冬菇及四季豆沖洗後幼切粒，備用。
4. 燒熱鑊落油1湯匙，先將臘肉粒放入爆炒一會，然後將其他材料及調味料加入炒勻，另加入2湯匙熱水煮1分鐘，加入適量獻汁煮至少許杰身，收火，放涼備用。
5. 將1份粉皮放在檯上，加入適量餡料，然後慢慢包成方形，排放在碟上蒸 5分鐘即成。

韋太小貼士:
粉皮好容易爛，處理時要小心。零碎的粉皮，可以留起做成另一涼盆菜色 [雞絲粉皮]。